مايهمكش كلامهم عنك | ببلولا ツ

شعر مايهمكش كلامهم عنك !

سيبك م اللى يزود ضيقك
وبيزرع أشواك فى طريقك

ويهدك و بيطفى بريقك ..
حتى ولو وحدك هتكون

في اللى بيتشفى فى أوجاعك
واللى إستمتع قوى بخداعك
دور شوف كام واحد باعك؟!
ودور على مين مش هتهون ؟!

طلع نفسك من وسطيهم
انفد من عدوى الزيف فيهم
غلطان لما تآمن ليهم ..
والطبع بيكدب و يخون

إياك تدبل أو تتكسر 👌
إصرخ.زعق.إبكى.إتحسر 😡
بس إوعاك عالجاى يأثر
وجعك مهما تشوف ويكون

إرجع عيش حلمك واتمنى
روحله.بلاش عندك تستنى
عيش الفرح ودوق وإتهنى
بالفرح هتلقاك مفتون 👌

اعمل كل اللى بيحلالك
ده محدش غيرك أبقالك
مين هيعيش العمر بدالك؟!
مهما يقولوا عليك مجنون

مايهمكش كلامهم عنك ✋
ولا تفرق قيمتك ولا سنك
عيش اليوم دايما وكأنك
بكرة ف عمرك مش مضمون

بقلم⇙ هانية جمال الدين